Difinisons
- “Veíkulu di rikriason” ô “veíkulus fóra di strada” – kualker veíkulu ki ten mutôr ô ki pôdu mutôr, pa uzu na téra non midjoradu pa diverson ô pa prazer, fóra di strada públiku. Es li ta inklui karrus tudu-terénu, môtas tudu-terénu, môta krós y veíkulus utilitariu rikriativu. Tanbé ta inklui tudu veíkulus rejistadu ki ten mutôr óra ki sta sirkula fóra di via strada públiku.
- “Veíkulus tudu-terénu” – veíkulu rikriativu ki ten mutôr nê-l ô ki foi modifikadu pa anda ku 4 pinêu di baxu prison y ki ten un lugar pa si kondutor y un gia pa kontrôla direson.
- “Môta krós” – veíkulu rikriativu ki é un môta levi, ki ten dós rôdas alinhadu, kriadu pa anda na lugares ki ka ten pavimentu, na strada di téra y na trilias.
- “Veíkulus utilitariu di rikriason” ô “veíkulus utilitariu” – un veíkulu ki ten mutôr ku pinêu di flutuason ki ten mínimu di 4 y másimu di 6 pinêu di baxu prison, ki ten limiti di silindrada di mutôr di 1,500 sentímitru kúbiku y ku pézu séku total másimu di 1,800 libras y ki ten un kau di xinta sima banku pa kondutor y un avulanti pa kontrôla.
Kontrôlu di Idadi
- Ningen ku menus di 18 anu ka pôdi kunduzi un veíkulu rikriativu ô veíkulu utilitariu rikriativu, a non ser ki djê fazi kursu di siguransa y risponsabilidadi pa veíkulus rikriativu. Pa más informason, entra en kontákitu ku Boat & RV Safety Bureau.
- Ningen ku menus di 16 anu y mêiu ka pôdi kunduzi un veíkulu rikriativu na strada públiku, a non ser si ê sta djuntu ku un algen adultu (18 anu ô más). Strada públiku y pasadêra débi sta ku sinal y ser aprovadu pa uzu di veíkulus rikriativu.
- Ningen ku idadi entri 14 a 16 anu ka pôdi kunduzi un veíkulu tudu-terénu ô un veíkulu utilitariu rikriativu ku silindrada más ki 90 sentímitru kúbiku. Óra ki algen ki teni di 14 a 16 anu di idadi sta kunduzi un veíkulu di 90 sentímitru kúbiku ô menus, ê ten ki sta kunpanhadu pa un adultu.
- Ningen ki teni idadi entri 10 a 14 anu ka pôdi kunduzi veíkulus rikriativu, a non ser ki ê sta diretamenti kunpanhadu pa un adultu duranti priparason ô duranti partisipason na un korida, ralí ô iventu autorizadu ki foi aprovadu pa autoridadis munisipal risponsavel pa pasa lisénsa. Si ê sta kunduzi un veíkulu tudu-terénu ô un veíkulu utilitariu rikriativu, silindrada di mutôr ten ki ser igual ô menus ki 90 sentímitru kúbiku.
- Algen ku ménus di 10 anu ‘so pôdi kunduzi môta-krós apropiadu pa si idadi/tamanhu, y kontroladu pa un algen adultu enkuantu ê sta pripara ô partisipa na un iventu autorizadu ki foi aprovadu pa autoridadis munisipal risponsavel pa pasa lisénsa. Priparason pa es iventu só pôdi kontisi na un propiadadi privadu.
Kuzas Proibidu
Di baxu sta alguns kuzas ki é proibidu:
- Kunduzi sôbri ifeitu di dróga ô di bebida alkóliku.
- Kunduzi na via públiku, atraves di un asésu pa auto-strada kontroladu.
- Ka pára pur konplêtu na kruza un via públiku aprovadu (débi dâ veíkulus ki ten mutôr prioridadi di pasajen).
- Kunduzi na un velosidadi irasional, inapropiadu ô sen ninhun siguransa têndu en konta kondisons izisténti.
- Kunduzi na terénu di algen sen ninhun autorizason pur skritu di dónu.
- Anda na distansia di ménus di 150 pês di kaza di un algen sen autorizason di dónu.
- Kunduzi un veíkulu ki sta bâza txeu fumu ô ki sta fazi txeu rabolisu.
- Kunduzi di manêra ki ta strága propiadadis públiku ô privadu.
- Kunduzi na un praia di mar ô na un duna di areia, di manêra ki ta distrui, dána ô straga kualker praia di mar, duna ô pádjas di duna.
- Kunduzi di manêra ki ta spánta ô áspra animal selvajen ô duméstiku.
- Kunduzi na kualker propiadadi públiku ki é ka fêtu pa uzu di veíkulus rikriativu.
Ekipamêntus di Siguransa
Algen ki sta kunduzi, ki sta viaja ô ki sta ser rabokadu pa un veíkulu rikriativu débi uza kapaséti aprovadu. Tanbé kada veíkulu rikriativu débi teni un sistéma di travajen drétu. É nisisariu teni un silensiador adikuadu y difinidu pa diminui rabolisu anormal ô izajeradu y fumus prejudisial. Kada veíkulu rikriativu débi sta ekipadu ku un ô más faról, lus di tras burmêdju y un rifletor di tras burmêdju óras ki ê sta anda na sol. Un trailer ki sta rabokadu na un veíkulu rikriativu débi ten un rifletor di tras burmêdju.
Rejistu, Autokolanti y Lisénsas di Trilia
Veíkulus rikriativu ki sta ser operadu pa un propiadadi públiku ô privadu débi ser rejistadu na Pulisia Anbêntal di Massachusetts, a non ser si ê sta ser uzadu só pa kuzas ki ten a ver ku agrikultura, floresta, madêra ô di konstruson. É nisisariu pidi es izénson. Rejistu di veíkulus rikriativu di ôtu stadu ka ta sirbi na Massachusetts. Autokolanti di matríkula ki foi atribuidu débi pôdu na tudu dós ladu di veíkulu di manêra ki ta fika klaru. Data di validadi débi fika pa ladu skerda di veíkulu. Kondutor débi teni sertifikadu di rejistu djuntu kô-l. .
Pa más informason sôbri rejistu, entra en kontákitu ku Pulisia Anbêntal di Massachusetts.
Asidentis
Kondutor ô dónu di veíkulu rikriativu involvidu na un kontron, asidentis ô ôtu asidentis ki rizulta na môrti ô pankáda di algun algen ô fazi strágus na propiadadi na valor di más di 50.00 dóla débi infôrma un pulisia imidiatamenti y aprizenta un rilatóriu pur skritu di asidentis na Pulisia Anbêntal di Massachusetts ti 48 óras. Pa bu ten asésu a formulariu di rilatóriu ô, pa más informason legal/di siguransa, entra en kontákitu ku Dipartamentu di Siguransa di Barkus y Veíkulus Rikriativu.
Violasons
Pa fazi dinunsia di kualker violason di lei sôbri veíkulus rikriativu ô môtas di jêlu, ô ôtus leis anbêntal ô di vida selvajen, kontakita Séntru di Radiu-kumunikason di Pulisial Anbêntal pa tilifôni 1-800-632-8075