Ki semelhansa ki ten entri tutéla y adoson?
Tutéla y adoson ta fornese un kriansa ô jóven pai(s) stável y ki ta da apoiu, dandu kuidador(is) tudu risponsabilidadi parental ki ta involve kuida di un kriansa ô jóven, sima oferese apoiu imusional y garanti ma es ta resebe tudu ben isensial, inkluindu un idukason adikuadu y kuidadus di saúdi. Pergunta ki más adivogadus y asistentis susial ta resebe sobri planiaméntu di permanénsia pa kriansas na akolhimentu familiar é, “Kal k’é diferénsa entri adoson y tutéla legal”? Enbóra ten otus diferénsa entri tutéla y adoson, un di kes diferénsa más inpurtanti é ki tutéla pode ser alteradu, enkuantu ki adoson é permanenti. Kel informason siginti ta ben djudá-bu rifliti na kuzê ki é midjor pa bo, bus fidju y bu família.
Tutéla ô adoson é permanenti?
Tutéla
Un tutéla ta permanese en vigor ti ki kriansa faze 18 anu, anonser ki tutor pidi afastaméntu ô tribunal tirmina kel tutéla. Kualker algen, inkluindu un pai/mai, pode mete un pitison na tribunal pa afasta un tutor ô pa tirmina un tutéla, si es konsigi mostra un “mudansa substansial y matirial na sirkunstánsias y kel-la é di interesi di kriansa”. Un tribunal tanbe pode tirmina un tutéla si tutor invistigadu ô akuzadu di abuzu ô niglijénsia di kriansa, ki rizulta na firiméntu substansial na korpu. Na maioria di sirkunstánsias, bu ka ta nomiadu un adivogadu, má bu pode kontrata un adivogadu pa riprizentá-bu. Pais, si rendiméntu é limitadu, y kriansa ta nomiadu adivogadus pa riprizentá-s. Si dja bu resebe tutéla, y pais entra ku un ason pa afastá-bu komu tutor, tribunal ta nômia un adivogadu pa bo si dja bu kuida di kel kriansa duranti peluménus dos anu, ô duranti un piríudu di ténpu signifikativu na vida di kel kriansa, y bu rendiméntu é limitadu.
Adoson
Óra ki un kriansa ta adotadu, adoson é pa sénpri. Duranti audiénsia di adoson, bu pode pidi pa muda nómi di kriansa. Pode imitidu un nóvu sertidon di nasiméntu y un nóvu karton di siguransa susial, asi ta tradu nómis di pais biolójiku y ta podu pai(s) adotivu komu pai(s) di kriansa. Adoson pode ser tirminadu atravês di un prusésu judisial ki ta tirmina direitus paternal pur inkapasidadi, di mésmu fórma ki direitus di un pai/mai biolójiku pode ser tirminadu pur kauza di abuzu ô niglijénsia di un kriansa.
Kriansa ten ki konkorda ku adoson ô tutéla?
Tutéla
Un kriansa ki ten 14 anu di idadi ô más ten ki konkorda ku tutéla.
Adoson
Un kriansa ki ten 12 anu di idadi ô más ten ki konkorda ku tutéla.
N pode resebe algun apoiu finanseru?
Sin. Bu pode resebe binifísius di adoson y tutéla, ki pode inklui seguru di saúdi, binifísius finanseru igual a valor di taxa diáriu di akolhimentu familiar, asisténsia ku izenson di propina y/ô binifísiu difiridu, ki signifika ma, si kriansa dizenvolve nisisidadis más tardi, pai/mai ô tutor pode pidi DCF pa aumenta asisténsia finanseru pa satisfaze nóvus nisisidadi di kriansa. Asistenti susial di Dipartaméntu sta obrigadu a tene un rikiriméntu di subsídiu prenxedu na nómi di kualker kriansa ki Dipartaméntu tene se guarda ku objetivu di adoson ô tutéla.
Módi ki n ta kualifika pa un subsídiu?
Subsídiu ta baziadu skluzivamenti na nisisidadis di kriansa y el ta avaliadu y ta dadu indipendentimenti di rendiméntu di família.
Tutéla
- Dipartaméntu atualmenti tene guarda permanenti di kriansa y é Dipartaméntu ki sta patrosina tutéla.
- Tutor pode ser parenti, spisífiku di kriansa ô rikursu lisensiadu sén ristrison.
- Subsídiu sta dispunível ti peluménus 18 anu di idadi y pode kualifika pa prulonga ti 22 anu di akordu ku alguns sirkunstánsia.
- Vólta pa kaza dja pensadu n’el y é ka un opson adikuadu.
- Adoson dja pensadu n’el y é ka un opson adikuadu.
Adoson
Kriansa ten ki sta ta resebe kuidadus substitutu di Dipartaméntu ô di un ajénsia di adoson sén fin lukrativu lisensiadu, adoson ten ki ser patrosinadu pa Dipartaméntu ô pa ajénsia sén fin lukrativu, y peluménus un di kes siginti é verdadi:
- Kriansa ten un ô más nisisidadi spisial ki ta kualifika y ki foi diagnostikadu pa un prufisional kualifikadu lisensiadu.
- É difísil koloka kriansa pamódi el é ménbru di un grupu di irmons ki sta ta adotadu djuntu.
- Nasiméntu ô spiriénsia familiar di kriansa ta po-l ku risku di ten nisisidadis spisial, má, pur kauza di idadi di kriansa, inda ka ta da pa faze un diagnóstiku konfiável.
Subsídiu pode ser prulongadu alén di 18 anu?
Si tutor ô pai/mai adotivu kontinua ta da kel jóven moradia y apoiu, subsídiu di tutéla y di adoson pode ser prulongadu ti 22 anu di akordu ku alguns sirkunstánsia, ki ta inklui:
- Kel jóven ten difisiénsia ô prubléma mental ô fíziku ki ta justifika kontinuason di asisténsia.
- Kel jóven sta matrikuladu nun skóla, prugrama di formason prufisional ô universidadi (stadual & federal).
Binifísius di subsídiu pode muda?
Sin, na tutéla y na adoson, ta fazedu rivizon di binifísius di subsídiu di 2 en 2 anu ti ki kel jóven konpleta 18 anu, y dipos anualmenti ti ki kel jóven konpleta 22 anu. Kel nível suplimentar/supirior di kuidadus pode ser aumentadu ô diminuídu si dukumentason ki aprizentadu duranti un rivizon indika un mudansa signifikativu na nisisidadis spisial di kriansa. Taxa diáriu rigular nunka ka ta diminuídu. Pa informason sobri subsídius, kontakta:
Unidadi di Subsídiu di Adoson/Tutéla di DCF
(800) 835-0838
dcfsubsidyunit@mass.gov
Kriansas ta kualifika pa binifísius di siguransa susial?
Tutéla
Si kriansa é bu nétu, kel kriansa pode kualifika pa binifísius di Siguransa Susial di akordu ku bu stóriku prufisional. Kel kriansa ta kontinua ta kualifika pa resebe kualker binifísiu di Siguransa Susial di akordu ku stóriku prufisional di ses pais. Kontakta Administrason di Siguransa Susial pa más informason.
Adoson
Si bo é riformadu, kriansa pode resebe binifísius di Siguransa Susial di akordu ku bu stóriku prufisional. Pa odja si bu ta kualifika, kontakta Administrason di Siguransa Susial.
Kriansas pode resebe penson di aliméntus (child support)?
Tutéla
Pididus di penson di aliméntus di pai(s) pode ser fetu pa tutor di kriansa y ditirminadu pa tribunal. Valor é di akordu ku rendiméndu di pai/mai. Pagaméntu di penson di aliméntus normalmenti ta fazedu ti ki kriansa konpleta 18 anu y valor sô pode mudadu voltandu pa tribunal y pidindu modifikason di órdi.
Adoson
Óra ki un kriansa adotadu, pais biolójiku dja ka ten risponsabilidadi di paga penson di aliméntus.
Ta kontinua ta ten vizitas ku pais biolójiku?
Tutéla
Pais biolójiku ten direitu di pidi vizita, ki tribunal pode pirmiti di akordu ku midjor interesi di kriansa. Si ka ten órdi judisial, tutor legal ki ta disidi orárius y frikuénsias di vizitas.
Adoson
Antis di adoson, pais biolójiku y adotivu pode sina un Akordu di Adoson Abértu ki ta spisifika frikuénsia di kontaktu futuru ku kriansa. Dipos di fin di direitus di pais, un juís pode disidi ma é di interesi di kriansa ten algun kontaktu ku pais biolójiku y ditirmina algun tipu di kontaktu. Si ka ten ninhun órdi judisial ô akordu, é pais adotivu ki ta disidi orárius y frikuénsias di vizitas.
Un akordu di vizitas pode muda?
Tutéla
Akordus di kontaktu/vizita pode ser mudadu si partis involvidu konkorda ô si tribunal ditirmina ma un mudansa é di interesi di kriansa. Izénplu, tribunal pode muda kel akordu y ditirmina pa vizitas ser aumentadu ô diminuídu, supervizionadu ô sén supervizon.
Adoson
Kel tribunal ki pirmiti kel adoson pode riduzi frikuénsia di vizitas ô kontaktu si pai/mai adotivu ta konsigi mostra ma kel-la é di interesi di kriansa. Un tribunal ka ten ninhun autoridadi pa aumenta vizita/kontaktu. Pai/mai biolójiku ka ten ninhun otu direitu alén di kes ki sta na órdi judisial ô na akordu di adoson abértu. Pais adotivu pode oferese más vizitas, si es kre.
Kuzê ki n pode faze si akordu ka sta ta sigidu?
Tutéla
Akordus di tutéla y órdis judisial pa vizita/kontaktu é obrigatóriu na kel tribunal undi ki es foi pirmitidu. Un muson ten ki aprizentadu, y un audiénsia ten ki fazedu. Bu pode kontrata un adivogadu pa riprizenta bus interesi na kel audiénsia. Pais y kriansas ten direitu a un adivogadu nomiadu pa tribunal.
Adoson
Akordus di adoson é obrigatóriu na kel tribunal undi ki el foi pirmitidu. Un muson ten ki aprizentadu, y un audiénsia ten ki fazedu. Bu pode kontrata un adivogadu pa riprizenta bus interesi na kel audiénsia. Pais y kriansas ten direitu a un adivogadu nomiadu pa tribunal. Bu ka ten ninhun direitu a un adivogadu nomiadu pa tribunal na kes sirkunstánsia li.
N pode muda nómi di kriansa?
Tutéla
Un mudansa di nómi ta iziji un prusésu na kel tribunal undi ki tutéla foi ditirminadu. Pais biolójiku ten direitu di ser obidu y di ser kóntra mudansa di nómi si direitus di pais inda ka tirmina. Tribunal pode nega mudansa di nómi. Si tribunal pirmiti un mudansa di nómi déntu di un tutéla, sertidon di nasiméntu ka ta mudadu.
Adoson
Pitison pa adoson di un menor pode inklui un pididu pa muda nómi di kriansa y un muson pa altera sertidon di nasiméntu dipos di adoson. Kel tribunal ki pirmiti adoson ta manda papelada nisisáriu pa statístikas vital, djuntu ku un sertidon di nasiméntu orijinal. Déntu di 4-6 simana, pais adotivu ta imitidu un nóvu sertidon di nasiméntu ki ta rifliti nómi di pais adotivu y nóvu nómi di kriansa, si mudadu.
Kenha ki ta toma disizons rilasionadu ku saúdi?
Tutéla
Un tutor ta toma disizons médiku di rutina, má el ka pode toma disizon ki ta involve trataméntu médiku “straordináriu” pa kriansa. Tutor debe pergunta prufisional di saúdi si kel trataméntu ta konsideradu “straordináriu” y, si sin, tribunal ta disidi si el ta pirmiti trataméntu. Si tribunal faze un ditirminason pa autoriza trataméntu médiku rikurenti, nton ten ki fazedu rivizon di kel ditirminason peluménus un bês pa anu. Atenson: bu seguru di saúdi pode pirmiti pa bu adisiona kriansa na bu apólisi dipos ki dja bu tene tutéla.
Adoson
Un pai/mai adotivu pode autoriza kualker trataméntu médiku, seja di rutina ô straordináriu, na nómi di kriansa.
Kenha ki ta toma disizons rilasionadu ku idukason?
Tutéla
Tutor ta toma disizons rilasionadu ku idukason.
Adoson
Pai/mai adotivu ta toma disizons rilasionadu ku idukason.
N sta obrigadu a aprizenta un rilatóriu na tribunal?
Tutéla
Tutor ten ki aprizenta un rilatóriu anual na kel tribunal ki imiti tutéla. Pa bu atxa furmuláriu di kel rilatóriu anual ki ta izijidu, konsulta:
Tribunal di Menoris: Report of the Guardian of the Minor (JV-078)
Tribunal di Susesons y Família: Annual Report of Guardian of Minor (MPC 443)
Adoson
Prusésu judisial é final. Gósi bo é pai/mai legal. Ka ta izijidu ninhun rilatóriu anual na tribunal.
Nha família pode muda di Massachusetts?
Tutéla
Tutor y kriansa pode muda di stadu ku pirmison di tribunal. Binifísius di saúdi y subsídius pode muda si bu sai di Massachusetts. Djobe konsedju di asistenti susial di kriansa ô di Unidadi di Subsídiu.
Adoson
Pai/mai adotivu ka meste pirmison di tribunal pa muda di stadu ku kriansa. Binifísius di saúdi y di prupina pode muda si bu sai di stadu. Djobe konsedju di asistenti susial di kriansa ô di Unidadi di Subsídiu.
Ki rilijion ki kriansa ta ben fika ta pratika?
Tutéla
Tutor ten ki dexa kriansa pratika rilijion ki kel kriansa ta prifiri.
Adoson
Un pai/mai adotivu pode disidi rilijion di kriansa.
N pode resebe asisténsia pa dispézas di universidadi?
Tutéla y adoson
Dipendendu di finansiaméntu di stadu, ten un Prugrama di Izenson di Prupina y Asisténsia ku Taxas na Universidadis di Stadu pa jóvens ki pasa peluménus sais mês na akolhimentu familiar di DCF antis di un tutéta patrosinadu pa DCF ô di un adoson patrosinadu pa DCF.
Tudu pididu di Sertifikadu di Izenson di Prupina debe bai djuntu ku un karta ki ta inklui nómi di pai(s) adotivu ô tutor, inderésu pa korespondénsia atual, nómi di kriansa, y un kópia di sertidon di nasiméntu di kriansa. Manda pididus y perguntas pa:
Unidadi di Subsídiu di Adoson/Tutéla di DCF
(800) 835-0838
dcfsubsidyunit@mass.gov
Attention: Subsidy Unit / Tuition Waiver
600 Washington Street, 6th floor, Boston, MA 02111
Konsulta kes link útil dibaxu pa más orientason:
- Dipartaméntu di Kriansas y Famílias (DCF) Prugrama di Izenson di Prupina y Asisténsia ku Taxas pa Kriansas na Lar di Akolhiméntu
- Dipartaméntu di Kriansas y Famílias (DCF) Prugrama di Izenson di Prupina y Asisténsia ku Taxas pa Kriansas Adotadu
- Lista di Virifikason di Kualifikason di Alunus pa Prugrama di Asisténsia ku Taxas pa Kriansas Adotadu y na Lar di Akolhiméntu di DCF
Kenha ki ta fika ku guarda di kriansa si n móre?
Tutéla
Dipos di mórti di tutor, tutéla ta finda, y guarda ta volta pa kenha ki tinha guarda antis ki tutélta foi pirmitidu. Izénplu, guarda ta volta pa pai/mai ô DCF si DCF tinha guarda antis. Un tutor pode nômia un nóvu tutor pa kel menor atravês di testaméntu, ô atravês di otu dukuméntu sinadu pa tutor y atestadu pa 2 tistimunha. Kel “nóvu” tutor ten ki entra ku un prusésu na tribunal na prazu di 30 dia dipos di mórti di tutor, pa konfirma kel nomiason.
Adoson
Na un família ki ten dos pai/mai, dipos di mórti di un pai/mai adotivu, guarda ta fika ku kel pai/mai ki sta bibu, prizumindu ma es tudu dos adota kel kriansa. Na famílias ki ten sô un pai/mai adotivu, kel pai/mai pode nômia un tutor atravês di testaméntu, ô atravês di otu dukuméntu sinadu pa pai/mai adotivu y atestadu pa 2 tistimunha. Kel tutor nomiadu ten ki entra ku un prusésu na tribunal na prazu di 30 dia dipos di mórti di tutor, pa konfirma kel nomiason.
Kriansa ta ben erda algun kuza di-meu?
Tutéla
Kriansas ka ta erda nada di tutor anonser ki tutor dexa un testaméntu izikutadu sinadu ku dos tistimunha. Kriansas ta erda di ses pais.
Adoson
Un kriansa adotadu ta ben erda di pais adotivu y el ka ten direitu a eransa di ses pais biolójiku, anonser ki pais biolójiku dexa kel kriansa un eransa através di un testaméntu sinadu ku dos tistimunha.
Ki sirvisus sta dispunível dipos ki n bira un tutor ô pai/mai adotivu?
Tutéla
Sirvisus ta fornesedu atravês di prestadoris kumunitáriu y/ô atravês di un prusésu di rikiriméntu vuluntáriu pa sirvisus klíniku di DCF. Bu pode kre kontakta:
- Adoption Journeys
- Kinship Navigator
- Commission on the Status of Grandparents Raising Grandchildren (Kumison sobri Situason di Avós ki ta Kria Nétus)
Adoson
Ten sirvisus pa dipos di adoson na kumunidadi y atravês di organizasons ki ten mison di apoia famílias adotivu y ses fidjus.
Es publikason foi iditadu y finansiadu pa Prugrama di Midjoraméntu di Tribunal di (CIP) di Massachusetts, ki ta resebe subsídius federal y é administradu pa Suprému Tribunal Judisial. CIP ta insentiva y ta apoia midjoraméntus sistémiku pa apoia siguransa, ben-star y permanénsia di kriansas. CIP ta kulabora ku partis interesadu na ben-star di kriansas na Massachusetts, inkluindu Tribunal di Menoris, Tribunal di Susesons y Família, Dipartaméntu di Kriansas y Famílias, y Ripartison di Direitu Infantil y di Família di Kumison pa Sirvisus di Konsultoria Públiku.