District/Municipal Court Rules  Orden permanenti konjuntu 1-26: Orden sobri audiensias di tribunal a distansia

Dipartamentu di tribunal munisipal di Boston i dipartamentu di tribunal distrital ta rikunhesi valor di audiensias ô iventus a distansia pa sertus prusesus di tribunal. Kuandu uzadu apropriadamenti, prizensa a distansia na tribunal podi midjora asesu a justisa, na riduzi bareiras di viajen, tenpu di folga di trabadju, kuidadus infantil i transporti pa partis, tistimunhas i adivogadus. Inbora prizensa a distansia na tribunal for apropriadu pa alguns asuntus, tribunal ainda é obrigadu manti prusesus prizensial na situasons en ki és é konstitusional ô statutariamenti izijidu, ô undi priokupasons ku kredibilidadi, justisa i prusesu legal ta iziji.

Komu juízes xefi di dipartamentu di tribunal munisipal di Boston i di dipartamentu di tribunal distrital, nu ta imiti siguinti orden permanenti konjuntu di akordu ku nós autorida di sob G.L. c. 211, § 10, G.L. c. 218, § 38, i G.L. c. 220, § 5.¹

Kel orden permanenti li debi SUBSTITUI i SUPERA tudu ordens antirior rilativu a videokunfirensias. Ta fika ORDENADU, ku ifeitu a partir di 1 di junhu di 2026:

Siguintis iventus podi fazedu a distansia, a nao ser ki for ordenadu di otu manera pa un juiz ô skrivon-majistradu:

1. Audiensias di konformida di kriminal i ileison;
2. Audiensias na mosons ka probatóriu na tudu kazus, ki ta inklui pididus di julgamentu rápidu;
3. Dizignason di datas di julgamentu;
4. Audiensias di status;
5. Audiensias di prusesu sumáriu, ixsetu julgamentus;
6. Audiensias kriminal di kauza pa mostra;
7. Audiensias na kistons di liberdadi kondisional, ixsetu audiensias di ditenson ô violason;
8. Audiensias i rikursus di infrasons sivil di veíkulus motorizadu;
9. Kunfirensias di jiston di kazus sivil i kunfirensias pré-julgamentu, mosons ka probatórius i kunfirensias di konsiliason judisial;
10. Audiensias di divizon di apelason, a nao ser ki juiz atual ordena ki asuntu for obidu pisualmenti; i
11. Kualker otu iventu ki un juiz ô skrivon-majistradu ta primiti pa kontisi a distansia i ki for pirmitidu pa lei.

Juízes ta manti diskreson pa ditirmina lokal di audiensias G.L. c. 123 i si debi fazedu audiensia a distansia. Kel orden permanenti li ka ta fazi presunson kuantu pa lokal di audiensias G.L. c. 123 ô si és é fazedu a distansia ô pisualmenti, ixsetu prusesus sob §§ 12, 15, & 35, undi pisoa ki sta rispondi sta sob kustódia di polísia; só kés prusesus li é prizumivelmenti fazedu pisualmenti pa ki kustódia podi ser tradu di polísia.

Na rikunhesi diversus nisisidadis i rikursus di diferentis tribunal, diferensas di volume i ajendamentu na tal audiensias baziadu na númeru di instalasons dentu di jurisdison di un tribunal, i prazus rigurozus aplikável a kés prusesus li, é risponsabilidadi di tribunal individual pa ditirmina undi pa ajenda audiensias G.L. c. 123 pa pisoas ki sta atualmenti ospitalizadu na un pitison di internason pendenti, ki ta inklui kés mantedu sob rigurozu siguransa di Bridgewater State Hospital, i si debi ajenda tal audiensias pisualmenti ô a distansia. Konsulta G.L. c. 123, § 5.

Siguintis lista ka ixklusivu di fatoris debi ser konsideradu, i ajendamentu inisial di pitisons aprizentadas podi ser fazedu di un manera pa garanti konformidadi ku prazus aplikável, pronta dizignason di adivogadu i notifikason di audiensia:

• númeru di kazus ajendadu na seson di saúdi mental;
• númeru di instalasons dentu di jurisdison di un tribunal individual;
• nisisidadis partikularis di transporti pa instalasons dentu di jurisdison di tribunal;
• si un instalason ta pirmiti ki audiensias fazedu prizensialmenti ô sta ristrinji asesu a pisoas ixternu;
• nisisidadis di ikipa pa fazi un audiensia prizensial, ki ta inklui, si prizensialmenti na tribunal, dispunibilidadi di funsionárius di saúdi mental sufisienti pa superviziona un pasienti;
• kapasidadi tikinolojia di tribunal pa fazi audiensias a distansia;
• kapasidadi tikinolojia di instalason pa fazi audiensias a distansia;
• dispunibilidadi di un sala di audiensias formal i dignu, di tamanhu sufisienti pa akumoda juiz, skrivon, ofisial(s) di justisa i públiku;
• garanti ki instalason é kapaz di da siguransa sufisienti pa tudu partis;
• garanti ki audiensia ta ser gravadu di un manera konpletu i integral;
• garanti ki audiensia ta ser abertu i asesível pa públiku.

Indipendentimenti di un tribunal individual ajenda sés audiensias di internason a distansia ô prizensialmenti, un juiz ta manti diskrison pa ditirmina, kazu a kazu, undi pa fazi audiensia i si a distansia ô prizensialmenti. Un juiz debi konsidera kualker moson aprizentadu na pidi un alterason na ajendamentu di audiensia, i debi konsidera fatoris listadu di riba, ben komu siguintis fatoris ka ixklusivus:

• kistons aprizentadu;
• lokalizason di partisipantis;
• stadu di saúdi di partisipantis;
• taxa di transmison di kualker duensas transmissível undi instalason sta lokalizadu.

Un juiz debi fazi konstatasons pur skritu si juiz nega un pididu di audiensia prizensial.

Prizensa a distansia signifika ki un ô tudu partis ta sisti na tilifoni, konputador, videokunfirensia ô meius kunparável (pur izenplu, Zoom). Pididu di un parti pa sisti a distansia ta rinunsia kualker objeson a otus partis ki sisti prizensialmenti. Si adivogadu sisti prizensialmenti, adivogadu podi pidi, i juiz ô skrivon-majistradu podi primiti, ki prizensa di parti for dispensadu, ô pidi ki parti sisti a distansia, si keli for pirmitidu pa lei. Izijensia pa un parti (ô partis) ta sisti prizensialmenti ka ta inpidi ki un adivogadu ô tistimunha sisti a distansia si juiz ô skrivon-majistradu ki fazi audiensia primiti, i si keli for pirmitidu pa lei.

Partis é obrigadu pa sisti tudu otus iventus judisial prizensialmenti, a nao ser ki parti pidi i juiz ô skrivon pirmti, ô juiz ô skrivon ordena ki parti sisti a distansia, i keli for pirmitidu pa lei. Ker si iventus judisial fazedu prizensialmenti ô a distansia, tribunal podi dispensa prizensa di un parti konformi pididu ô si parti for riprizentadu pa adivogadu i kuandu keli for pirmitidu pa lei.

Ninhun pisoa debi tra fotografias, ô fazi kualker gravason ô transmison pa meius iletrônikus, di un audiensia judisial a distansia ô mistu, sen autorizason préviu di juiz ô di majistradu skrivon ku supervizon imidiatu na audiensia a distansia ô mistu, na konformida di ku regra 1:19 di supremu tribunal judisial, ki ta guverna asesu iletrôniku pa tribunal.

Pa motivus di asesu públiku pa audiensias prizensial, a distansia ô mistu abertu pa públiku, menbrus di públiku podi asesa audiensias di tribunal di siguinti manera:

1. Pa audiensias prizensial, undi ninhun parti ta sisti a distansia, menbrus di públiku debi sisti prizensialmenti.
2. Pa audiensias a distansia, undi tudu partis ta sisti a distansia, menbrus di públiku podi asesa audiensia a distansia.
3. Pa audiensias mistu, undi pelu menus un parti ta sisti prizensialmenti, inkuantu pelu menus otu parti ô partisipanti ta sisti a distansia, menbrus di públiku debi sisti prizensialmenti.
   
   Menbrus di públiku podi pidi pirmison pa tribunal pa asesa un audiensia mistu a distansia.

Menbrus di públiku ki ta buska informasons ô instrusons spisífiku na asesu públiku pa audiensias prizensial, a distansia ô mistu na un kazu spisífiku debi entra en kontatu ku kartóriu pa ten más ditalhis.

Kel orden li ta entra en vigor na 1 di junhu di 2026 i ta manti en vigor ti novu orden di kés tribunal li.