គោលការណ៍តុលាការជំនុំជម្រះ ស្តីពីការហាមឃាត់ការរើសអើង ការបៀតបៀន និងការសងសឹក សំណួរដែលគេសួរញឹកញាប់សម្រាប់អ្នកប្រើប្រាស់សេវាកម្មតុលាការ (FAQs)

តុលាការជំនុំជម្រះនៃរដ្ឋ Massachusetts ប្តេជ្ញាចិត្តក្នុងការលើកកម្ពស់បរិយាកាសប្រកបដោយការគោរពសម្រាប់បុគ្គលទាំងឡាយណា ដែលត្រូវការចូលប្រើប្រាស់សាលាកាត់ក្ដី និងសេវាកម្មតុលាការ។ យើងផ្តល់ជូននូវសំណួរដែលគេសួរញឹកញាប់ (FAQs) ទាំងនេះ ដើម្បីផ្តល់នូវភាពច្បាស់លាស់ និងតម្លាភាពអំពីគោលការណ៍ និងនីតិវិធីនៃតុលាការជំនុំជម្រះក្តី។

ប្រសិនបើលោកអ្នកមិនអាចស្វែងរកព័ត៌មានដែលលោកអ្នកកំពុងស្វែងរកនៅក្នុង FAQs ទាំងនេះទេ សូមទាក់ទងមកកាន់លេខទូរសព្ទជំនួយនៃ ការិយាល័យសិទ្ធិកន្លែងធ្វើការ និងការអនុលោមតាមច្បាប់ (OWRC) តាមរយៈលេខ [phone] ឬផ្ញើអ៊ីមែលទៅកាន់ [e-mail] ដើម្បីទទួលបានជំនួយ។

អំពីគោលការណ៍

1. តើអ្វីគឺជាគោលការណ៍របស់តុលាការជំនុំជម្រះស្តីពីការរើសអើង ការបៀតបៀន និងការសងសឹក?

សាលាជំនុំជម្រះនៃរដ្ឋ Massachusetts ហាមឃាត់រាល់ការរើសអើង និងការបៀតបៀន ដោយផ្អែកលើលក្ខណៈសម្បត្តិដែលត្រូវបានការពារ (សូមមើលសំណួរទី 4 ទាក់ទងនឹងលក្ខណៈសម្បត្តិដែលត្រូវបានការពារ)។ គោលការណ៍នេះក៏ការពារភាគីទាំងឡាយណាដែលចូលរួមក្នុងសកម្មភាពពាក់ព័ន្ធនឹងបណ្តឹងរើសអើងផងដែរ ដូចជាការដាក់ពាក្យបណ្តឹង ឬការផ្តល់សក្ខីកម្មក្នុងនាមជាសាក្សីជាដើម។

2. តើតុលាការជំនុំជម្រះអនុវត្តគោលការណ៍នេះដោយរបៀបណា?

ការិយាល័យសិទ្ធិកន្លែងការងារ និងការអនុលោមតាមច្បាប់ ឬហៅកាត់ថា OWRC នៃតុលាការជំនុំជម្រះគឺជាអ្នកទទួលខុសត្រូវក្នុងការអនុវត្តតាមតម្រូវការទាំងឡាយនៃគោលការណ៍នេះ។ OWRC គឺជាការិយាល័យឯករាជ្យមួយនៅក្នុងប្រព័ន្ធតុលាការជំនុំជម្រះដែលមានតួនាទីឆ្លើយតបទៅនឹងបណ្តឹងទាំងឡាយទាក់ទងនឹងការរើសអើង ការបៀតបៀន និងការសងសឹក ដោយផ្អែកលើលក្ខណៈសម្បត្តិដែលត្រូវបានការពារ (សូមមើលសំណួរទី 4 អំពីលក្ខណៈសម្បត្តិដែលត្រូវបានការពារ)។

បុគ្គលិករបស់ OWRC នឹងធ្វើការពិនិត្យលើរាល់ពាក្យបណ្តឹងទាំងអស់។ រាល់បណ្តឹងណាដែលបង្ហាញថាអាចមានការរើសអើង ការបៀតបៀន ឬការសងសឹក ផ្អែកលើលក្ខណៈសម្បត្តិដែលត្រូវបានការពារ នឹងត្រូវដោះស្រាយដោយ OWRC។ OWRC មានសមត្ថកិច្ចក្នុងការស្វែងរកដំណោះស្រាយក្រៅផ្លូវការរវាងគូភាគី ឬបន្តទៅរកការស៊ើបអង្កេតពេញលេញ (សូមមើលសំណួរទី 10)។ ទោះជាយ៉ាងណាក៏ដោយ OWRCអាចនឹងបញ្ជូនបណ្តឹងណាដែលមិនមានលក្ខណៈរំលោភលើគោលការណ៍នេះទៅកាន់ការិយាល័យផ្សេងទៀតដែលសមស្របជាងនៅក្នុងប្រព័ន្ធតុលាការជំនុំជម្រះ។ បន្ទាប់ពីទទួលបានពាក្យបណ្តឹង OWRC នឹងជូនដំណឹងដល់ភាគីដើមបណ្តឹងអំពីជំហានបន្ទាប់ ទោះបីជាត្រូវដោះស្រាយក្រៅផ្លូវការ ការបញ្ជូនបន្ត ឬការស៊ើបអង្កេតពេញលេញក៏ដោយ។

3. ក្នុងនាមជាអ្នកប្រើប្រាស់សេវាកម្មតុលាការ តើខ្ញុំត្រូវបានការពារដោយគោលការណ៍នេះដែរឬទេ?

បាទ/ចាស ពិតណាស់។ អ្នកប្រើប្រាស់សេវាកម្មតុលាការ រួមមាន ភាគីវិវាទ សាក្សី មេធាវី គណៈវិនិច្ឆ័យ និងសាធារណជនទូទៅ គឺស្ថិតនៅក្រោមការការពារនៃគោលការណ៍នេះ។ គោលការណ៍នេះ ក៏រួមបញ្ចូលផងដែរនូវអ្នកផ្តល់សេវាដែលមិនមែនជាបុគ្គលិក ដូចជា អ្នកម៉ៅការ អ្នកចុះកម្មសិក្សា និងអ្នកស្ម័គ្រចិត្តជាដើម។ ប្រសិនបើលោកអ្នកគឺជាអ្នកប្រើប្រាស់សេវាកម្មតុលាការ ឬជាអ្នកផ្តល់សេវាមិនមែនជាបុគ្គលិក លោកអ្នកមានសិទ្ធិទទួលបានសេវាកម្មពីសាលាជំនុំជម្រះ និងទទួលបានការការពារពីការរើសអើង និងការបៀតបៀន ដោយផ្អែកលើលក្ខណៈសម្បត្តិដែលត្រូវបានការពារ ក្នុងអំឡុងពេលបំពេញកិច្ចការជាមួយសាលាជំនុំជម្រះ។ លើសពីនេះ គោលការណ៍នេះក៏ការពារលោកអ្នកពីការសងសឹកផងដែរ ប្រសិនបើលោកអ្នកប្រើប្រាស់សិទ្ធិរបស់ខ្លួនក្រោមគោលការណ៍នេះ។

បន្ថែមពីនេះ ដោយសារសាលាជំនុំជម្រះមានការទទួលខុសត្រូវក្នុងការផ្តល់នូវកន្លែងធ្វើការដែលគ្មានការរើសអើង និងការបៀតបៀនសម្រាប់បុគ្គលិករបស់ខ្លួន ដូច្នេះប្រសិនបើអ្នកប្រើប្រាស់សេវាកម្មតុលាការ ឬអ្នកផ្តល់សេវាមិនមែនជាបុគ្គលិកណាម្នាក់ មានឥរិយាបថរើសអើង ឬបៀតបៀនចំពោះបុគ្គលិកសាលាជំនុំជម្រះ ដែលជាការល្មើសនឹងគោលការណ៍នេះ សាលាជំនុំជម្រះមានសិទ្ធិចាត់វិធានការសមស្របនានា ដើម្បីឆ្លើយតបនឹងឥរិយាបថបែបនោះ ក្នុងនាមតំណាងឱ្យបុគ្គលិករបស់ខ្លួននៅក្រោមគោលការណ៍នេះ។

4. តើអ្វីទៅជា "លក្ខណៈសម្បត្តិដែលត្រូវបានការពារ"?

លក្ខណៈសម្បត្តិដែលត្រូវបានការពារ រួមមាន៖ ពូជសាសន៍, ពណ៌សម្បុរ, ភេទ (រួមទាំងការបៀតបៀនផ្លូវភេទ, ការមានផ្ទៃពោះ, ការសម្រាលកូន និងស្ថានភាពវេជ្ជសាស្ត្រដែលទាក់ទងនឹងការមានផ្ទៃពោះ ឬការសម្រាលកូន និងការបំបៅដោះកូន), អាយុ (លើសពី 40 ឆ្នាំ), ពិការភាព, និន្នាការផ្លូវភេទ, អត្តសញ្ញាណយេនឌ័រ, កាតព្វកិច្ចយោធា ឬស្ថានភាពជាអតីតយុទ្ធជន, សាសនា ឬជំនឿសាសនា, ដើមកំណើតជាតិ, ព័ត៌មានហ្សែន និងពូជអំបូរ។ លក្ខណៈដែលត្រូវបានការពារទាំងនេះ ត្រូវបានកំណត់ដោយច្បាប់រដ្ឋ និង/ឬ ច្បាប់សហព័ន្ធ។

គោលការណ៍នេះ ហាមឃាត់ការរើសអើង ឬការបៀតបៀនលើបុគ្គលដែលស្នើសុំការសម្របសម្រួលសមស្រប ដោយសារមូលហេតុពិការភាព, ការមានផ្ទៃពោះ ឬការប្រតិបត្តិសាសនា។

ការដាក់ពាក្យបណ្តឹង

5. ខ្ញុំបានដាក់ពាក្យបណ្តឹងទៅកាន់តុលាការជំនុំជម្រះពាក់ព័ន្ធនឹងការរើសអើង និងការបៀតបៀន។ តើមានអ្វីកើតឡើងបន្តទៀត?

សមាជិកបុគ្គលិក OWRC នឹងទាក់ទងទៅលោកអ្នក ដើម្បីពិភាក្សាអំពីលក្ខណៈនៃបណ្ដឹងរបស់លោកអ្នក។ អាស្រ័យលើកាលៈទេសៈ OWRC អាចនឹងជជែកជាមួយលោកអ្នកភ្លាមៗ ដើម្បីធ្វើសម្ភាសន៍បឋម ឬពួកគេអាចនឹងស្នើសុំណាត់ជួបសម្ភាសន៍នៅពេលក្រោយបន្តិចដែលសមស្របសម្រាប់ភាគីពាក់ព័ន្ធទាំងអស់។

ការសម្ភាសន៍បឋមភាគច្រើនធ្វើឡើងតាមរយៈទូរសព្ទ ឬការហៅជាវីដេអូ។ ក្នុងករណីភាគច្រើន នឹងមានបុគ្គលពីររូបពី OWRC ចូលរួមក្នុងការសម្ភាសន៍នេះ។ លោកអ្នកគួររំពឹងថានឹងត្រូវបានសួរដេញដោលអំពីបណ្ដឹងរបស់លោកអ្នក រួមមាន៖ ឈ្មោះបុគ្គលដែលពាក់ព័ន្ធ ទីកន្លែង កាលបរិច្ឆេទ និងពេលវេលានៃហេតុការណ៍ដែលបានកើតឡើង និងថាតើវាមានជាប់ពាក់ព័ន្ធនឹងលក្ខណៈសម្បត្តិដែលត្រូវបានការពារដោយច្បាប់យ៉ាងដូចម្តេច។ លោកអ្នកក៏អាចនឹងត្រូវបានស្នើសុំឱ្យផ្តល់ឯកសារពាក់ព័ន្ធផ្សេងៗ និងព័ត៌មានអំពីសាក្សីដែលអាចមានផងដែរ។ លើសពីនេះ លោកអ្នកគួរតែប្រាប់បុគ្គលិក OWRC ផងដែរ ប្រសិនបើហេតុការណ៍នោះបានជះឥទ្ធិពលដល់លោកអ្នក និងជះឥទ្ធិពលយ៉ាងដូចម្ដេចខ្លះ។

អ្វីដែលសំខាន់ ការសម្ភាសន៍បឋមនេះក៏ជាឱកាសសម្រាប់លោកអ្នកក្នុងការសួរសំណួរអំពី OWRC និងនីតិវិធីរបស់ការិយាល័យនេះ ព្រមទាំងស្វែងរកជម្រើសផ្សេងៗសម្រាប់ការដោះស្រាយ ដោយមានការជួយជ្រោមជ្រែងពីបុគ្គលិក OWRC ផងដែរ។

6. តើមានជម្រើសអ្វីខ្លះសម្រាប់ការដោះស្រាយពាក្យបណ្តឹងរបស់ខ្ញុំ?

អាស្រ័យលើប្រភេទនៃពាក្យបណ្ដឹង និងលទ្ធផលដែលភាគីអ្នកប្ដឹងចង់បាន OWRC អាចផ្ដល់ជូននូវជម្រើសមួយចំនួន។ យ៉ាងហោចណាស់ OWRC អាចស្ដាប់នូវកង្វល់របស់អ្នក ហើយប្រសិនបើអ្នកមិនចង់បន្តដោះស្រាយរឿងនេះទៅមុខទៀតទេ OWRC អាចគ្រាន់តែរៀបចំទុកជាកំណត់ត្រានៃបញ្ហានោះតែប៉ុណ្ណោះ។

OWRC ក៏អាចជួយសម្របសម្រួលក្នុងការដោះស្រាយក្រៅផ្លូវការផងដែរ។ ករណីនេះអាចរួមបញ្ចូលទាំងការពិភាក្សាសង្ខេប ការធ្វើអន្តរាគមន៍ ឬការផ្ដល់ប្រឹក្សាជាមួយភាគីឆ្លើយតប។ ប្រសិនបើជម្រើសនេះត្រូវបានជ្រើសរើស OWRC នឹងជូនដំណឹងដល់អ្នកនៅពេលដែលការដោះស្រាយក្រៅផ្លូវការនោះបានបញ្ចប់ ដែលជាធម្មតាធ្វើឡើងជាលាយលក្ខណ៍អក្សរ។ 

ជម្រើសចុងក្រោយគឺ OWRC នឹងធ្វើការស៊ើបអង្កេតពេញលេញ (សូមមើលសំណួរទី 13)។

7. ខ្ញុំមានការព្រួយបារម្ភអំពីការការពារអត្តសញ្ញាណរបស់ខ្ញុំតាមរយៈដំណើរការនេះ។ តើការិយាល័យសិទ្ធិកន្លែងធ្វើការ និងការអនុលោមតាមច្បាប់អាចជួយអ្វីបានខ្លះចំពោះការព្រួយបារម្ភនេះ?

គោលការណ៍របស់សាលាជំនុំជម្រះអនុញ្ញាតឱ្យបុគ្គលម្នាក់ៗដាក់ពាក្យបណ្តឹងដោយមិនបញ្ចេញឈ្មោះ។ ទោះបីជាជម្រើសនេះមានក៏ដោយ ប៉ុន្តែវាអាចជាបញ្ហាប្រឈមសម្រាប់បុគ្គលិក OWRC ក្នុងការស៊ើបអង្កេតឱ្យបានហ្មត់ចត់។ រាល់ពាក្យបណ្តឹងដែលដាក់ដោយមិនបញ្ចេញឈ្មោះគួរតែមានព័ត៌មានលម្អិតតាមដែលអាចធ្វើទៅបាន ជាមួយនឹងព័ត៌មានដែលអាចផ្ទៀងផ្ទាត់បានកាន់តែច្រើនកាន់តែប្រសើរ ដូចជាឈ្មោះសាក្សី កាលបរិច្ឆេទ ពេលវេលា និងទីកន្លែងជាដើម។

ម្យ៉ាងវិញទៀត អ្នកអាចដាក់ពាក្យបណ្តឹងទៅកាន់ OWRC ប៉ុន្តែស្នើសុំរក្សាការសម្ងាត់។ OWRC នឹងការពារអត្តសញ្ញាណរបស់អ្នកឱ្យអស់ពីលទ្ធភាព នៅពេលអនុវត្តតាមនីតិវិធីរបស់ខ្លួន។ ទោះជាយ៉ាងណាក៏ដោយ ចំពោះពាក្យបណ្តឹងមួយចំនួន អត្តសញ្ញាណរបស់បុគ្គលម្នាក់អាចនឹងត្រូវបានគេសម្គាល់ដឹងយ៉ាងងាយស្រួល ដោយភាគីចុងចម្លើយ ឬសាក្សីផ្សេងទៀត ដោយផ្អែកលើព័ត៌មានលម្អិត និងលក្ខណៈនៃពាក្យបណ្តឹង ទោះបីជាឈ្មោះរបស់អ្នកមិនត្រូវបានបង្ហាញក៏ដោយ។

ជាទូទៅ OWRC ដំណើរការទៅតាមគោលការណ៍ “ដឹងត្រឹមតែអ្វីដែលចាំបាច់”។ ដូច្នេះហើយ ព័ត៌មានដែលមានកម្រិតអាចនឹងត្រូវបានចែកចាយទៅកាន់បុគ្គលដែលត្រូវបានជ្រើសរើសមួយចំនួន ដែលចាំបាច់ត្រូវដឹងសម្រាប់គោលបំណងនៃការរក្សាប្រតិបត្តិការរបស់តុលាការ។ ការធ្វើបែបនេះ ជួយយើងក្នុងការរក្សានូវលក្ខណៈសម្ងាត់នៃដំណើរការនេះ ការពារសុពលភាពនៃការអង្កេត និងគាំទ្រដល់បុគ្គលទាំងឡាយណាដែលប្រហែលជាមានការរុញរាក្នុងការបញ្ចេញមតិ។

លើសពីនេះ គោលការណ៍ក៏ហាមឃាត់ការសងសឹកផងដែរ។ ដូចនេះ រាល់បុគ្គលិកតុលាការណាដែលធ្វើការសងសឹកប្រឆាំងនឹងភាគីដាក់ពាក្យបណ្តឹង ឬសាក្សី នឹងត្រូវទទួលវិធានការដោយសាលាជំនុំជម្រះ។

8. តើសិទ្ធិកន្លែងធ្វើការ និងការអនុលោមតាមច្បាប់ជាជម្រើសតែមួយគត់របស់ខ្ញុំក្នុងការបន្តប្តឹងផ្តល់មែនទេ?

ទេ អ្នកប្រើប្រាស់សេវាកម្មតុលាការមានសិទ្ធិដាក់ពាក្យបណ្ដឹងទៅកាន់គណៈកម្មការប្រឆាំងនឹងការរើសអើងនៃរដ្ឋ Massachusetts (MCAD) ក្នុងពេលដំណាលគ្នាជាមួយនឹងការដាក់ពាក្យទៅកាន់ OWRC ផងដែរ។ លើសពីនេះ គណៈកម្មការឱកាសការងារស្មើភាពគ្នា (EEOC) ក៏ជាជម្រើសមួយផ្សេងទៀត ដើម្បីដោះស្រាយករណីពាក់ព័ន្ធនឹងការងារ។

9. តើខ្ញុំអាចដាក់ពាក្យបណ្តឹងប្រឆាំងនឹងចៅក្រម ឬក្រឡាបញ្ជីបានដែរឬទេ?

បាន។ ទោះជាយ៉ាងណាក៏ដោយ ដោយសារតែលក្ខន្តិកៈដែលផ្តល់នូវការត្រួតពិនិត្យពិសេសលើចៅក្រមតុលាការជំនុំជម្រះ ក្រឡាបញ្ជី មន្ត្រីចុះបញ្ជី និងមន្ត្រីកត់ត្រា ការិយាល័យសិទ្ធិកន្លែងធ្វើការ និងការអនុលោមតាមច្បាប់ (OWRC) នឹងបញ្ជូនបន្តនូវរាល់ពាក្យបណ្តឹងដែលចោទប្រកាន់ពីការរើសអើង ការបៀតបៀន ឬការសងសឹកដោយមន្ត្រីទាំងនេះ ទៅកាន់ប្រធានយុត្តិធម៌តាមផ្នែក។
ប្រធានយុត្តិធម៌តាមផ្នែកមានភារកិច្ចទទួលខុសត្រូវក្នុងការស៊ើបអង្កេតពាក្យបណ្តឹងប្រឆាំងនឹងចៅក្រម (ឬអាចចាត់តាំង OWRC ឱ្យធ្វើការស៊ើបអង្កេតក្នុងនាមខ្លួន) លើកលែងតែពាក្យបណ្តឹងដែលបានដាក់ទៅគណៈកម្មការស្តីពីសីលធម៌ចៅក្រម។ ចំពោះពាក្យបណ្តឹងប្រឆាំងនឹងក្រឡាបញ្ជី ប្រធានយុត្តិធម៌តាមផ្នែកអាចធ្វើការស៊ើបអង្កេតដោយផ្ទាល់ អាចផ្តល់សិទ្ធិឱ្យ OWRC ស៊ើបអង្កេត ឬបញ្ជូនពាក្យបណ្តឹងនោះទៅគណៈកម្មាធិការតុលាការជំនុំជម្រះស្តីពីការទទួលខុសត្រូវវិជ្ជាជីវៈសម្រាប់ក្រឡាបញ្ជីតុលាការ ដើម្បីធ្វើការស៊ើបអង្កេត។

ក្នុងអំឡុងពេលដំណើរការ

10. ខ្ញុំមិនចង់ជួបជាមួយបុគ្គលិកការិយាល័យសិទ្ធិកន្លែងធ្វើការ និងការអនុលោមតាមច្បាប់ម្នាក់ឯងទេ។ តើខ្ញុំអាចនាំអ្នកតំណាងមកជាមួយបានទេ?

បាន។ ទោះជាយ៉ាងណាក៏ដោយ វាគឺជាការទទួលខុសត្រូវរបស់អ្នកក្នុងការធានាថា តំណាងរបស់អ្នកមានពេលវេលាគ្រប់គ្រាន់សម្រាប់គោលបំណងនៃកិច្ចប្រជុំបឋមនេះ។ បុគ្គលិករបស់ OWRC អាចមានភាពបត់បែន ប្រសិនបើចាំបាច់ត្រូវសម្របសម្រួលទៅតាមកាលវិភាគរបស់ភាគីច្រើននាក់។ បន្ថែមពីនេះទៀត តំណាងម្នាក់អាចមានវត្តមានដើម្បីផ្តល់ប្រឹក្សា និងយោបល់ដល់អ្នក ប៉ុន្តែពួកគេមិនគួររំពឹងថានឹងឆ្លើយសំណួរជំនួសអ្នកនោះឡើយ។

11. តើខ្ញុំអាចថតសំឡេងក្នុងអំឡុងពេលកិច្ចប្រជុំបានទេ?

ជាទូទៅ OWRC មិនអនុញ្ញាតឱ្យមានការថតសំឡេងក្នុងកិច្ចប្រជុំឡើយ។ ផ្ទុយទៅវិញ បុគ្គលិករបស់ OWRC នឹងកត់ត្រានូវខ្លឹមសារនៃកិច្ចប្រជុំ ហើយលោកអ្នកក៏អាចកត់ត្រាដោយខ្លួនឯងបានផងដែរ ប្រសិនបើលោកអ្នកចង់។ ការសម្របសម្រួលពិសេស អាចនឹងត្រូវបានធ្វើឡើងសម្រាប់ជនមានពិការភាព។

12. ចុះបើខ្ញុំមានព័ត៌មានបន្ថែមសម្រាប់រាយការណ៍ បន្ទាប់ពីការសម្ភាសន៍បឋមរួច?

ប្រសិនបើលោកអ្នកបានរំលងព័ត៌មានដែលពាក់ព័ន្ធ ឬមានព័ត៌មានថ្មីណាមួយដែលលោកអ្នកទើបតែទទួលបាន លោកអ្នកគួរតែជូនដំណឹងទៅកាន់បុគ្គលិកដែលជាអ្នកសម្របសម្រួលរបស់ OWRC។ ប្រសិនបើចាំបាច់ បុគ្គលិក OWRC អាចនឹងរៀបចំកាលវិភាគសម្ភាសន៍បន្ថែម ដើម្បីប្រមូលព័ត៌មានពាក់ព័ន្ធបន្ថែមទាំងនោះ។

13. តើ "ការស៊ើបអង្កេតពេញលេញ" រួមមានអ្វីខ្លះ?

ដំណើរការសម្រាប់ការស៊ើបអង្កេតត្រូវបានកំណត់នៅក្នុងគោលការណ៍។ នេះគឺជាទិដ្ឋភាពទូទៅសង្ខេប៖

ក) បន្ទាប់ពីការសម្ភាសន៍បឋមបានបញ្ចប់ បុគ្គលិករបស់ OWRC នឹងទាក់ទង និងសម្ភាសសាក្សី ព្រមទាំងពិនិត្យមើលភស្តុតាងជាឯកសារពាក់ព័ន្ធ ប្រសិនបើមាន។

ខ) OWRC នឹងជូនដំណឹងដល់ភាគីចុងចម្លើយអំពីការចោទប្រកាន់ប្រឆាំងនឹងពួកគេ ជួបជាមួយពួកគេ និងផ្តល់ឱកាសឱ្យពួកគេឆ្លើយតបទៅនឹងការចោទប្រកាន់ទាំងនោះ។ ពួកគេក៏អាចមានសិទ្ធិចូលពិនិត្យមើលច្បាប់ចម្លងនៃពាក្យបណ្តឹងរបស់អ្នកផងដែរ។

គ) OWRC នឹងយកព័ត៌មានពាក់ព័ន្ធទាំងអស់មកវិភាគ និងរៀបចំសេចក្តីព្រាងរបាយការណ៍ដែលកត់ត្រាអំពីជំហាននៃការស៊ើបអង្កេត ការរកឃើញអង្គហេតុ និងការរកឃើញពាក់ព័ន្ធនឹងការរំលោភលើគោលការណ៍ដែលអាចកើតមាន។

ឃ) OWRC នឹងចែករំលែកសេចក្តីព្រាងរបាយការណ៍របស់ខ្លួនជាមួយអ្នកគ្រប់គ្រងដែលសមស្របនៅក្នុងតុលាការជំនុំជម្រះ។

ង) នាយកនៃ OWRC នឹងបិទបញ្ចប់របាយការណ៍ជាស្ថាពរ បន្ទាប់ពីមានការពិគ្រោះយោបល់ជាមួយអ្នកគ្រប់គ្រងដែលសមស្រប។

ច) អ្នកស៊ើបអង្កេតរបស់ OWRC នឹងផ្ញើលិខិតបិទបញ្ចប់សំណុំរឿងដែលមានព័ត៌មានលម្អិតទៅកាន់ភាគីដើមបណ្តឹង និងភាគីចុងចម្លើយដើម្បីជម្រាបពួកគេអំពីសេចក្តីសន្និដ្ឋាននៃការស៊ើបអង្កេត។ លិខិតនោះរៀបរាប់អំពីការរកឃើញអង្គហេតុ និងសេចក្តីសន្និដ្ឋាននានាដែលទទួលបាន។ ភាគីទាំងសងខាងនឹងមិនទទួលបានរបាយការណ៍ស៊ើបអង្កេតពេញលេញនោះទេ។

បន្ទាប់ពីការស៊ើបអង្កេត

14. ពាក្យបណ្តឹងរបស់ខ្ញុំត្រូវបានបញ្ជាក់ថា "មានមូលដ្ឋាន" (ឬ "គ្មានមូលដ្ឋាន") តើវាមានន័យដូចម្តេច?

ប្រសិនបើ OWRC បញ្ជាក់ថាពាក្យបណ្ដឹងរបស់អ្នកមានមូលដ្ឋានច្បាស់លាស់ វាមានន័យថាមានភស្តុតាងគ្រប់គ្រាន់ដើម្បីរកឃើញថា ហេតុការណ៍នោះពិតជាបានកើតឡើងប្រាកដមែន ហើយទង្វើដែលជាបញ្ហានោះបានរំលោភលើគោលការណ៍របស់តុលាការ ប្រឆាំងនឹងការរើសអើង ការបៀតបៀន និងការសងសឹក។

ប្រសិនបើ OWRC បញ្ជាក់ថាពាក្យបណ្ដឹងរបស់អ្នកមិនមានមូលដ្ឋានច្បាស់លាស់ទេ វាអាចមកពីមូលហេតុផ្សេងៗ។ ឧទាហរណ៍៖

• មិនមានភស្តុតាងគ្រប់គ្រាន់ ដើម្បីគាំទ្រដល់មូលដ្ឋានអង្គហេតុនៃការអះអាង។
• ហេតុការណ៍មួយអាចនឹងបានកើតឡើង ប៉ុន្តែហេតុការណ៍នោះមិនអាចផ្សារភ្ជាប់ទៅនឹងការបែងចែកប្រភេទដែលត្រូវបានការពារណាមួយឡើយ។
• ហេតុការណ៍មួយអាចនឹងបានកើតឡើង ប៉ុន្តែមានភស្តុតាងគ្រប់គ្រាន់ដែលបង្ហាញថា សកម្មភាពដែលនាំឱ្យមានការអះអាងនោះ គឺផ្អែកលើហេតុផលស្របច្បាប់ និងមិនមានលក្ខណៈរើសអើង។

OWRC នឹងសន្មតថាពាក្យបណ្តឹងទាំងឡាយត្រូវបានដាក់ជូនក្នុងបំណងល្អ។ ប្រសិនបើយើងមិនមានភស្តុតាងគ្រប់គ្រាន់ដើម្បីបញ្ជាក់ថាការអះអាងណាមួយត្រឹមត្រូវ វាមិនមែនជាភស្តុតាងដែលបញ្ជាក់ថាបុគ្គលនោះបានដឹងខ្លួនជាមុន ហើយមានចេតនាដាក់ពាក្យបណ្តឹងក្លែងក្លាយនោះទេ។

15. ប្រសិនបើខ្ញុំមិនយល់ស្របនឹងសេចក្តីសន្និដ្ឋាននៃការស៊ើបអង្កេត តើខ្ញុំអាចប្តឹងឧទ្ធរណ៍បានទេ?

មិនមាននីតិវិធីប្តឹងឧទ្ធរណ៍សម្រាប់ការស៊ើបអង្កេតរបស់ OWRC ទេ ហើយសេចក្តីសន្និដ្ឋានគឺជាការសម្រេចចុងក្រោយ។ មធ្យោបាយផ្សេងទៀត ដូចជា MCAD ឬ EEOC ដូចដែលបានបញ្ជាក់ពីមុន អាចនឹងមានសម្រាប់អ្នក។ (សូមមើលសំណួរទី 9)

Last updated:	May 18, 2026